फायर इंजिनसाठी लाखोंचा खर्च; नगरपंचायतीची इमारत मात्र खासगी वाहनांच्या पार्किंगसाठी?
सिरोंचा नगरपंचायतीच्या कारभारावर प्रश्नचिन्ह; अग्निशमन यंत्रणा उभारण्याऐवजी इमारतीचा वापर कशासाठी?
सिरोंचा :– सुरेश तिपट्टीवार
सिरोंचा नगरपंचायतीकडून नागरिकांच्या सुरक्षेच्या दृष्टीने अग्निशमन (फायर इंजिन) वाहन ठेवण्यासाठी सुमारे दोन-तीन वर्षांपूर्वी लाखो रुपयांचा निधी खर्च करून स्वतंत्र इमारत उभारण्यात आली. मात्र, सद्यस्थितीत या इमारतीचा अपेक्षित उपयोग होत नसल्याचा आरोप नागरिकांकडून केला जात आहे.
फायर इंजिनसाठी उभारण्यात आलेल्या या इमारतीत खासगी वाहने उभी असल्याचे चित्र समोर आले आहे. त्यामुळे सार्वजनिक निधीतून उभारलेली इमारत नेमकी कोणत्या कारणासाठी वापरली जात आहे, असा सवाल नागरिकांकडून उपस्थित होत आहे.
फायर इंजिन कुठे, खासगी वाहने कुठे?
नगरपंचायतीने लाखो रुपयांचा खर्च करून इमारत उभारल्यानंतर तिचा नियमित व नियोजित वापर होत नसेल, तर त्या बांधकामाचा उद्देशच काय, असा प्रश्न उपस्थित होत आहे. अग्निशमन वाहनासाठी असलेल्या जागेचा वापर खासगी वाहनांच्या पार्किंगसाठी होत असेल, तर त्यास परवानगी कोणी दिली? तसेच या इमारतीत खासगी वाहने ठेवण्यासाठी कोणतीही अधिकृत परवानगी अथवा भाडेकरार आहे का, याची माहिती नगरपंचायतीने सार्वजनिक करावी, अशी मागणी होत आहे.
सार्वजनिक निधीचा उपयोग की खासगी पार्किंग?
आगीसारख्या आपत्कालीन परिस्थितीत अग्निशमन वाहन वेळेत उपलब्ध होणे अत्यंत महत्त्वाचे असते. अशा परिस्थितीत फायर इंजिनसाठी उभारलेली इमारतच अपेक्षित वापरात नसेल, तर आपत्कालीन व्यवस्थेच्या कार्यक्षमतेबाबत प्रश्न निर्माण होणे स्वाभाविक आहे.
लाखो रुपयांचा निधी खर्च करून उभारलेल्या या इमारतीचा वापर नियोजित उद्देशासाठीच करण्यात यावा, खासगी वाहनांना पार्किंगची सुविधा देण्यासाठी नव्हे, अशी मागणी नागरिकांकडून होत आहे.
नगरपंचायत प्रशासनाने स्पष्टीकरण द्यावे
या इमारतीत खासगी वाहने का ठेवण्यात येत आहेत? वाहनधारकांकडून कोणतेही भाडे आकारले जाते का? इमारत खासगी वाहनांसाठी वापरण्याची परवानगी कोणी दिली? तसेच फायर इंजिनसाठीची व्यवस्था सध्या कुठे आहे? या सर्व प्रश्नांवर सिरोंचा नगरपंचायत प्रशासनाने स्पष्ट भूमिका मांडण्याची गरज आहे.
सार्वजनिक पैशातून उभारलेली इमारत सार्वजनिक गरजेसाठी वापरली जाणार की खासगी वाहनांच्या पार्किंगसाठीच ठेवली जाणार? हा प्रश्न आता सिरोंचा शहरातील नागरिकांकडून उपस्थित केला जात आहे.
About the Author
