तिरंगा फडकला, ‘वंदे मातरम्’ दुमदुमले; मद्दिगुडम जि. प. शाळेत स्वातंत्र्य दिन उत्साहात साजरा
अहेरी (विशेष प्रतिनिधी): गिरीश नरोटे
आकाशात डौलाने फडकणारा तिरंगा आणि परिसरात दुमदुमणारे ‘वंदे मातरम्’चे सूर… अशा अत्यंत देशभक्तीमय आणि उत्साही वातावरणात पंचायत समिती अहेरी अंतर्गत वेलगूर केंद्रातील जिल्हा परिषद प्राथमिक शाळा, मद्दिगुडम येथे स्वातंत्र्य दिन साजरा करण्यात आला.
कार्यक्रमाची सुरुवात ‘वंदे मातरम्’च्या समूहगायनाने झाली. वंदे मातरम् गीताला १५० वर्षे पूर्ण होत असल्याच्या पार्श्वभूमीवर यंदाच्या सोहळ्यात या गीताला विशेष महत्त्व देण्यात आले होते. गावातील ज्येष्ठ नागरिक मोंडी कंदीकुरवार यांच्या हस्ते मुख्य ध्वजारोहण पार पडले. ध्वजारोहणानंतर उपस्थितांना विविध सामाजिक विषयांवर शपथ देण्यात आली.
विविध उपक्रम आणि विद्यार्थ्यांची संगीत कवायत
सोहळ्यादरम्यान शाळेच्या वतीने तंबाखूमुक्त शाळा, महिला सन्मान, नवभारत साक्षरता आणि ‘उल्लास भारत’ यांसारख्या विविध सामाजिक व शैक्षणिक उपक्रमांची माहिती देण्यात आली. याप्रसंगी विद्यार्थ्यांनी ‘माझी शाळा सदैव तंबाखूमुक्त ठेवणार’ असा दृढ संकल्प केला. यानंतर विद्यार्थ्यांनी सादर केलेल्या लयबद्ध संगीतमय कवायतीने उपस्थितांची मने जिंकली.
उत्साहात निघाली प्रभातफेरी
स्वातंत्र्य दिनाचे औचित्य साधून जिल्हा परिषद शाळेपासून ते स्थानिक हनुमान मंदिरापर्यंत भव्य प्रभातफेरी काढण्यात आली. हातात तिरंगा घेऊन विद्यार्थ्यांनी दिलेल्या देशभक्तीपर घोषणांनी संपूर्ण परिसर दणाणून गेला होता. या प्रभातफेरीमुळे गावात उत्साहाचे आणि देशभक्तीचे वातावरण निर्माण झाले.
विद्यार्थिनींची देशभक्तीपर भाषणे
शाळेतील विद्यार्थिनी नंदिनी पोटे, समीक्षा गुंडावार आणि लावण्या सादघरे यांनी आपल्या ओघवत्या भाषणांमधून स्वातंत्र्यसैनिकांच्या बलिदानाला उजाळा देत उपस्थितांना देशभक्तीचा संदेश दिला.
ग्रामस्थ व मान्यवरांची उपस्थिती
या कार्यक्रमाला शाळेच्या मुख्याध्यापिका एस. डब्ल्यू. मुधोळकर, शाळा व्यवस्थापन समितीच्या अध्यक्षा कविता पोटे, अंगणवाडी सेविका शोभा मादासवार, समितीचे सर्व सदस्य, शिक्षक-शिक्षिका आणि गावातील नागरिक मोठ्या संख्येने उपस्थित होते.
कार्यक्रमाचे नेटके सूत्रसंचालन स्त्रिता राऊत यांनी केले, तर उपस्थितांचे आभार शबरी मडावी यांनी मानले. सोहळ्याच्या यशस्वीतेसाठी शाळेतील सर्व शिक्षकवृंद व मुख्याध्यापिकांनी विशेष परिश्रम घेतले.
About the Author
