वैद्यकीय क्षेत्रातील अद्भूत किमया! हेडरीच्या LKAMH रुग्णालयात अवघ्या ३ मिनिटांत तिळ्यांचा जन्म; आईसह तिन्ही बाळे सुखरूप
विशेष बातमी : सुगत उराडे
हेडरी (गडचिरोली):
गडचिरोलीसारख्या दुर्गम आणि आव्हानात्मक आदिवासी भागात वैद्यकीय चमत्काराची एक अद्भुत घटना समोर आली आहे. हेडरी येथील लॉयड्स काली अम्मल मेमोरियल हॉस्पिटल (LKAMH) च्या तज्ज्ञ डॉक्टरांच्या पथकाने अत्यंत गुंतागुंतीची प्रसूती यशस्वी करत एक नवा वस्तुपाठ घालून दिला आहे. आपत्कालीन सिझेरियन शस्त्रक्रियेद्वारे अवघ्या ३ मिनिटांत ३ अकाली (प्री-मॅच्युअर) बाळांचा सुरक्षित जन्म घडवून आणत डॉक्टरांनी चार जीव वाचवले आहेत.
३२ आठवड्यांचा गर्भ आणि डॉक्टरांचे धाडस
मंगेर येथील ३२ वर्षीय गर्भवती महिला मार्च २०२६ पासून LKAMH रुग्णालयात नियमित तपासणी करत होत्या. गर्भात तीन बाळे असल्याने ही गर्भधारणा अत्यंत उच्च जोखमीची (High-Risk) होती. ११ ऑगस्ट रोजी पोटदुखी सुरू झाल्यानंतर त्यांना दाखल करण्यात आले.
२१ ऑगस्ट रोजी नियमित तपासणीदरम्यान बाळांची हृदयगती आणि रक्तप्रवाहात अडथळा निर्माण झाल्याचे डॉक्टरांच्या निदर्शनास आले. परिस्थितीचे गांभीर्य ओळखून बहुविशेषज्ञ डॉक्टरांच्या पथकाने क्षणार्धात ‘इमरजन्सी सिझेरियन’ चा निर्णय घेतला.
घड्याळाच्या काटावर यशस्वी शस्त्रक्रिया (रात्री ९:२५ ते ९:२७)
स्त्रीरोगतज्ज्ञ, भूलतज्ज्ञ आणि बालरोगतज्ज्ञांच्या संयुक्त प्रयत्नांतून ३२ आठवडे ५ दिवसांच्या गर्भाशयातील तिन्ही बाळांना अवघ्या तीन मिनिटांत बाहेर काढण्यात आले:
पहिले बाळ (मुलगी): वजन १.३६० कि.ग्रॅ. (वेळ: रात्री ९:२५)
दुसरे बाळ (मुलगी): वजन १.१८६ कि.ग्रॅ. (वेळ: रात्री ९:२६)
तिसरे बाळ (मुलगा): वजन १.५३० कि.ग्रॅ. (वेळ: रात्री ९:२७)
आई अन् बाळे सुरक्षित; NICU मध्ये विशेष देखभाल
अकाली जन्म झाल्यामुळे तिन्ही नवजात बालकांना तातडीने अत्याधुनिक नवजात अतिदक्षता विभागात (NICU) हलवण्यात आले आहे. बालरोगतज्ज्ञांचे पथक त्यांच्यावर चोवीस तास लक्ष ठेवून आहे. सध्या आई आणि तिन्ही बाळांची प्रकृती पूर्णपणे स्थिर आहे.
”वेळेवर घेतलेला अचूक निर्णय आणि वैद्यकीय पथकाची तत्परता यामुळे चार मौल्यवान जीव सुरक्षित राहिले आहेत. गडचिरोलीतील ग्रामीण आणि आदिवासी भागाला जागतिक दर्जाच्या आरोग्य सेवा देण्यासाठी LKAMH कटिबद्ध आहे.”
— बी. प्रभाकरन (व्यवस्थापकीय संचालक, लॉयड्स मेटल्स अँड एनर्जी लि.)
दुर्गम भागातही अत्याधुनिक तंत्रज्ञान आणि तज्ज्ञ डॉक्टरांची उपलब्धता असल्यास कोणत्याही वैद्यकीय आव्हानावर मात करता येते, हेच हेडरीच्या या घटनेने पुन्हा एकदा सिद्ध केले आहे.
About the Author
