कोडसेलगुडम येथे जागतिक आदिवासी दिन उत्साहात साजरा
आदिवासी अस्मिता, संस्कृती आणि विकासाचा संदेश; ग्रामस्थांचा उत्स्फूर्त सहभाग
कोडसेलगुडम | प्रतिनिधी
अहेरी तालुक्यातील मौजा कोडसेलगुडम येथे ९ ऑगस्ट जागतिक आदिवासी दिन उत्साहपूर्ण वातावरणात साजरा करण्यात आला. आदिवासी समाजाची पारंपरिक संस्कृती, अस्मिता आणि सामाजिक एकजूट जपत शिक्षण, आरोग्य व विकासाच्या माध्यमातून समाजाला पुढे नेण्याचा संदेश यावेळी देण्यात आला.
कार्यक्रमाचे उद्घाटन सीनेट सदस्या मा. तनुश्रीताई आत्राम यांच्या हस्ते झाले. कार्यक्रमाच्या अध्यक्षस्थानी सरपंच मा. रजनिताताई मडावी होत्या. प्रमुख पाहुणे म्हणून डॉ. आलाम साहेब (प्राथमिक आरोग्य केंद्र, कमलापूर), API मा. वाडवी साहेब (रेपनपल्ली), सामाजिक कार्यकर्ते मा. बाबुराव तोर्रेम तसेच HM मा. मीनाताई आत्राम उपस्थित होते.
शिक्षणातून नव्या पिढीने प्रगती साधावी : तनुश्रीताई आत्राम
यावेळी मार्गदर्शन करताना मा. तनुश्रीताई आत्राम यांनी आदिवासी समाजाच्या सर्वांगीण विकासासाठी शिक्षणाला केंद्रस्थानी ठेवण्याचे आवाहन केले. आदिवासी समाजाची ओळख, परंपरा आणि संस्कृती जपत नव्या पिढीने शिक्षणाच्या माध्यमातून विविध क्षेत्रांत आपले स्थान निर्माण करावे, असे त्यांनी सांगितले.
महिला आणि युवकांनी सामाजिक विकासामध्ये सक्रिय सहभाग घेतला पाहिजे. समाजातील प्रत्येक घटकाने एकजुटीने पुढे येऊन शिक्षण, आरोग्य आणि विकासाच्या प्रश्नांवर काम केल्यास आदिवासी समाजाची प्रगती अधिक वेगाने होईल, असेही त्यांनी नमूद केले.
कार्यक्रमाचे प्रास्ताविक मा. सांबय्या करपेत, माजी सरपंच यांनी केले. उपस्थित मान्यवरांनी जागतिक आदिवासी दिनाचे महत्त्व स्पष्ट करताना आदिवासी समाजाच्या हक्कांसाठी, संस्कृतीच्या संवर्धनासाठी आणि विकासासाठी संघटितपणे प्रयत्न करण्याचे आवाहन केले.
कार्यक्रमाला ग्रामस्थ, महिला, युवक, विद्यार्थी आणि समाजबांधवांची मोठ्या संख्येने उपस्थिती होती. पारंपरिक वातावरणात झालेल्या या कार्यक्रमामुळे गावात उत्साहाचे वातावरण निर्माण झाले.
आदिवासी अस्मिता, संस्कृती आणि विकासाचा संदेश देत कोडसेलगुडम येथे जागतिक आदिवासी दिन उत्साहात साजरा करण्यात आला.
About the Author
