नवेगावात नवीन अंगणवाडीचे लोकार्पण; कुपोषणमुक्तीसह बालकांच्या शिक्षणाचा दर्जा उंचावण्याचा संकल्प
कोटमी ग्रामपंचायतीच्या सरपंच सिंधू मोहंदा यांच्या हस्ते उद्घाटन
नवेगाव येथील बालकांच्या आरोग्य व शैक्षणिक विकासाला मिळणार चालना
प्रतिनिधी : सुगत उराडे
कोटमी (२१ सप्टेंबर २०२६):
ग्रामपंचायत कोटमी अंतर्गत मौजा नवेगाव येथे नव्याने सुरू करण्यात आलेल्या अंगणवाडी केंद्राचे उद्घाटन आज कोटमी ग्रामपंचायतीच्या सरपंच कु. सिंधू घिसू मोहंदा यांच्या शुभहस्ते उत्साहात पार पडले.
ग्रामीण भागातील लहान मुलांना बालवयातच योग्य शिक्षण व संस्कार मिळावेत, शिक्षणाची गोडी निर्माण व्हावी तसेच पोषणविषयक सुविधा पुरवून कुपोषणमुक्तीच्या ध्येयाला गती मिळावी, या उद्देशाने हे नवीन अंगणवाडी केंद्र सुरू करण्यात आले आहे. या केंद्रामुळे नवेगाव परिसरातील बालकांच्या शैक्षणिक व सर्वांगीण विकासाला मोठे बळ मिळणार आहे.
प्रमुख उपस्थितांची नोंद
या सोहळ्याप्रसंगी ग्रामपंचायत शिपाई विलास मोहरेवार, रोजगार सेवक शिवाजी कुमरे, गाव पाटील झगडू मट्टामी, सोमजी कुमोटी, नवेगावच्या अंगणवाडी सेविका छाया सोमजी कुमोटी, मदतनीस ज्योती मट्टामी आणि एटावाहीच्या अंगणवाडी सेविका कांता पठाण यांच्यासह गावातील नागरिक, महिला व लहान मुले मोठ्या संख्येने उपस्थित होती.
सुरक्षित व पोषक वातावरणात मिळणार धडे
नवीन अंगणवाडी केंद्रामुळे गावातील चिमुकल्यांना आता सुरक्षित, आनंददायी आणि पोषक वातावरणात प्राथमिक शिक्षण व मार्गदर्शन उपलब्ध होणार आहे. यामुळे ग्रामीण भागातील बालकांच्या आरोग्याला आणि शैक्षणिक प्रगतीला योग्य दिशा मिळेल, असा विश्वास या प्रसंगी व्यक्त करण्यात आला.
About the Author
