टिटोळा ग्रामस्थांचा एटापल्ली प्रशासनाला घेराव; रस्ते, शाळा व नागरी सुविधांच्या प्रश्नांवर निवेदनातून तातडीने उपायांची मागणी
एटापल्ली (प्रतिनिधी : सुगत उराडे, २१ सप्टेंबर २०२६) :
ग्रामपंचायत जांबिया अंतर्गत येणाऱ्या मौजा टिटोळा येथील रस्ते, नाल्या, मोरी-पूल व जि.प. शाळेतील सुविधा यांसारख्या मूलभूत प्रश्नांकडे प्रशासनाचे अक्षम्य दुर्लक्ष होत असल्याने टिटोळा आणि परिसरातील ग्रामस्थ आक्रमक झाले आहेत. या प्रलंबित समस्या सोडवण्यासाठी ग्रामस्थांच्या शिष्टमंडळाने एटापल्लीचे गटविकास अधिकारी (बीडीओ) मा. पेंदाम साहेब यांची भेट घेऊन त्यांना मागण्यांचे निवेदन सादर केले.
पावसाळ्यात टिटोळा गावातील रस्त्यांची दुरवस्था अधिकच गंभीर बनते. नाल्यांची योग्य सोय नसल्याने पावसाचे पाणी रस्त्यावर आणि सखल भागात साचून राहते. यामुळे सर्वसामान्य नागरिकांच्या दैनंदिन रहदारीसह शाळेत जाणाऱ्या विद्यार्थ्यांचे प्रचंड हाल होत आहेत. गावातील मूलभूत सोयी-सुविधा दीर्घकाळापासून प्रलंबित राहिल्याने नागरिकांमध्ये प्रशासनाविरोधात तीव्र संतापाचे वातावरण आहे.
ग्रामस्थांच्या प्रमुख मागण्या :
रस्ते सुधारणा व डांबरीकरण : आवश्यक ठिकाणी मुरुमीकरण करून अडंगे ते टिटोळा रस्त्याचे डांबरीकरण करण्यात यावे. तसेच टिटोळा ते पामजीगुडा आणि टिटोळा ते झारेवडा हे रस्ते तातडीने पक्के करण्यात यावेत.
नाल्या व पुलांचे बांधकाम : साचणाऱ्या पाण्याच्या निचऱ्यासाठी रस्त्याच्या दोन्ही बाजूंनी पक्क्या नाल्या, मोरी आणि आवश्यक त्या ठिकाणी पुलांचे बांधकाम करण्यात यावे.
शैक्षणिक सुविधा : टिटोळा येथील जिल्हा परिषद शाळेत कायमस्वरूपी शिक्षकाची नियुक्ती करावी, शिक्षक कोटारची दुरुस्ती करावी आणि अंगणवाडीला संरक्षक भिंत (वाल कंपाऊंड) उभारण्यात यावी.
निवेदन सादर करताना टिटोळा ग्रामसभा अध्यक्ष लक्ष्मण जेट्टी, पामजगुडा ग्रामसभा अध्यक्ष बंडू दोरपेटी, टिटोळा ग्रामसभा सचिव उमेश वेळदा तसेच सदस्य शामराव दोरपेटी यांच्यासह अनेक ग्रामस्थ उपस्थित होते. गावाच्या सर्वांगीण विकासासाठी आणि ग्रामस्थांना दिलासा देण्यासाठी संबंधित विभागांनी या समस्यांचे तातडीने निवारण करावे, अशी जोरदार मागणी या वेळी करण्यात आली.
About the Author
