शासनाच्या दुर्लक्षाविरोधात शेतकऱ्यांचा एल्गार! १२ नोव्हेंबरला भामरागड तहसील कार्यालयावर भव्य मोर्चा
संपूर्ण भामरागड तालुका दुष्काळग्रस्त घोषित करण्यासह नुकसानग्रस्त शेतकऱ्यांना तातडीने आर्थिक मदत देण्याची मागणी; कॉम्रेड सचिन मोतकुरवार यांचे जनतेला मोठ्या संख्येने सहभागी होण्याचे आवाहन
गडचिरोली | भामरागड तालुका प्रतिनिधी : गिरीष डी. नरोटे
भामरागड : अनियमित पाऊस, पावसातील दीर्घ खंड, किडींचा प्रादुर्भाव आणि प्रतिकूल हवामानामुळे खरीप हंगामातील पिकांचे मोठ्या प्रमाणात नुकसान झाल्याने शेतकरी आर्थिक संकटात सापडले आहेत. या संकटग्रस्त शेतकऱ्यांना न्याय मिळवून देण्यासाठी भारतीय कम्युनिस्ट पार्टी (CPI) आणि ऑल इंडिया किसान सभा (AIKS), गडचिरोली जिल्हा यांच्या वतीने गुरुवार, १२ नोव्हेंबर २०२६ रोजी भामरागड तहसील कार्यालयावर भव्य शेतकरी मोर्चा काढण्यात येणार आहे. संपूर्ण भामरागड तालुका दुष्काळग्रस्त घोषित करून शेतकऱ्यांना तातडीने आर्थिक मदत द्यावी, या प्रमुख मागणीसाठी हा मोर्चा आयोजित करण्यात आला आहे.
गुरुवारी सकाळी ११ वाजता PWD रेस्ट हाऊस, भामरागड येथून मोर्चाला सुरुवात होऊन तहसील कार्यालयावर धडक देण्यात येणार आहे.
यंदाच्या खरीप हंगामात भामरागड तालुक्यात अनियमित पाऊस, पावसातील दीर्घ खंड, किडींचा प्रादुर्भाव तसेच मुरासू चक्रीवादळाचा परिणाम आणि इतर नैसर्गिक संकटांमुळे शेतकऱ्यांचे मोठे नुकसान झाले आहे. शेतीवर अवलंबून असलेल्या कुटुंबांसमोर उदरनिर्वाह, कर्जफेड आणि पुढील हंगामासाठी बियाणे व खते खरेदी करण्याचा गंभीर प्रश्न निर्माण झाला आहे. मात्र, संकटग्रस्त शेतकऱ्यांना अपेक्षित मदत मिळत नसल्याने शेतकरी संघटनांनी आंदोलनाचा पवित्रा घेतला आहे.
‘आश्वासनं नकोत, शेतकऱ्यांना प्रत्यक्ष आर्थिक मदत द्या!’
भारतीय कम्युनिस्ट पार्टीचे गडचिरोली जिल्हा सहसचिव कॉम्रेड सचिन मोतकुरवार यांनी शासनाच्या भूमिकेवर नाराजी व्यक्त करताना सांगितले की, शेतकरी नैसर्गिक संकटांशी झुंज देत असताना शासनाने त्यांना तातडीने मदत देणे आवश्यक आहे. जनतेच्या मूलभूत प्रश्नांकडे दुर्लक्ष करून संकटग्रस्त शेतकऱ्यांना केवळ आश्वासनांवर ठेवणे खपवून घेतले जाणार नाही. शेतकऱ्यांना भाषणे आणि आश्वासने नकोत, तर प्रत्यक्ष आर्थिक मदत व योग्य नुकसानभरपाई हवी आहे. संपूर्ण भामरागड तालुका दुष्काळग्रस्त घोषित करून सर्व गावांमध्ये तातडीने पीक नुकसानीचे पंचनामे करावेत. शेतकरी, शेतमजूर आणि कष्टकरी जनतेच्या हक्कांसाठी CPI चा संघर्ष सुरूच राहील, असा इशाराही त्यांनी दिला.
मोर्चातील प्रमुख मागण्या
१. संपूर्ण भामरागड तालुका तातडीने दुष्काळग्रस्त घोषित करावा.
२. तालुक्यातील सर्व गावांमधील पीक नुकसानीचे तातडीने पंचनामे करावेत.
३. नुकसानग्रस्त शेतकऱ्यांना आर्थिक मदत व योग्य नुकसानभरपाई द्यावी.
४. पात्र शेतकऱ्यांना पीक विमा व शासकीय योजनांचा लाभ मिळवून द्यावा.
५. कृषी कर्जाबाबत नियमानुसार आवश्यक सवलती उपलब्ध करून द्याव्यात.
६. पुढील खरीप हंगामासाठी शेतकऱ्यांना बियाणे व खते उपलब्ध करून द्यावीत.
७. सादर केलेल्या निवेदनावर तातडीने कार्यवाही करून त्याची लेखी माहिती द्यावी.
जनतेच्या एकजुटीतून शेतकऱ्यांच्या हक्कांचा लढा!
शेतकऱ्यांचा प्रश्न हा केवळ एका कुटुंबाचा प्रश्न नसून संपूर्ण ग्रामीण समाजाच्या अस्तित्वाशी जोडलेला आहे. त्यामुळे या लढ्याला व्यापक जनसमर्थन मिळावे, यासाठी शेतकरी, शेतमजूर, युवक, महिला आणि सर्वसामान्य नागरिकांनी मोठ्या संख्येने मोर्चात सहभागी व्हावे, असे आवाहन CPI व AIKS यांच्या वतीने करण्यात आले आहे.
मोर्चाचा तपशील :
दिनांक : गुरुवार, १२ नोव्हेंबर २०२६
वेळ : सकाळी ११ वाजता
प्रारंभस्थळ : PWD रेस्ट हाऊस, भामरागड
समारोप : तहसील कार्यालय, भामरागड
आवाहनकर्ते : कॉम्रेड दिनेश अरकी (78430 15948), कॉम्रेड रमेश कलंगा (94202 79079), कॉम्रेड सुरेश मज्जी (82377 90254), कॉम्रेड सरजू मज्जी (70582 77848), कॉम्रेड समय येमुलवार (84216 52102), कॉम्रेड सरजू ताडो (8530392295), कॉम्रेड दुलसा मडावी (7028554530), कॉम्रेड बाळू ईडके (7276152328), कॉम्रेड अनिल मंडल (9960940152), गणेश तीर्थगिरीवार (9403171439).
संघर्षाच्या घोषणा :
भामरागड तालुका दुष्काळग्रस्त घोषित करा!
शेतकऱ्यांना तातडीने नुकसानभरपाई द्या!
जनतेची उपेक्षा बंद करा!
शेतकरी एकजुटीचा विजय असो!
About the Author
