💧दोन थेंब प्रत्येक वेळी..पोलिओवर विजय दरवेळी!” 💧
नगराध्यक्षा सौ. पद्माताई भोगे यांच्या हस्ते सिरोंच्यात राष्ट्रीय पल्स पोलिओ अभियानाचा दिमाखदार शुभारंभ
“एकही बालक पोलिओच्या दोन थेंबांपासून वंचित राहू देणार नाही” – नगराध्यक्षा पद्माताई भोगे
सिरोंचा | प्रतिनिधी
राष्ट्रीय पल्स पोलिओ अभियानांतर्गत रविवार, दि. २८ जून २०२६ रोजी शासकीय रुग्णालय, सिरोंचा येथे पल्स पोलिओ दिवस मोठ्या उत्साहात व जनसहभागातून साजरा करण्यात आला. या महत्त्वपूर्ण आरोग्य अभियानाचा शुभारंभ नगराध्यक्षा सौ. पद्माताई भोगे यांच्या शुभहस्ते फीत कापून करण्यात आला. यानंतर त्यांनी उपस्थित पालकांच्या मुलांना स्वतः पोलिओ प्रतिबंधक लसीचे दोन थेंब पाजून अभियानाची औपचारिक सुरुवात केली.
यावेळी बोलताना नगराध्यक्षा सौ. पद्माताई भोगे यांनी सांगितले की, “निरोगी बालक हेच सशक्त समाजाचे आणि विकसित भारताचे खरे बळ आहे. आपल्या शहरातील एकही बालक पोलिओ प्रतिबंधक लसीपासून वंचित राहू नये, यासाठी पालकांनी जबाबदारीने पुढे यावे. प्रत्येकाने आपल्या ० ते ५ वर्षे वयोगटातील मुलांना पोलिओचे दोन थेंब पाजून या राष्ट्रीय अभियानाला यशस्वी करावे.”
त्यांनी आरोग्य विभागाच्या कार्याचे कौतुक करत सर्व डॉक्टर, परिचारिका, आशा स्वयंसेविका व आरोग्य कर्मचाऱ्यांचे अभिनंदन केले. तसेच सिरोंचा शहरात पोलिओमुक्त, निरोगी आणि सुरक्षित बालपण घडविण्यासाठी नगरपरिषद आणि आरोग्य विभाग कायम सहकार्य करेल, अशी ग्वाहीही त्यांनी दिली.
या प्रसंगी उपस्थित मान्यवरांनीही पालकांना आवाहन करत सांगितले की, पोलिओसारख्या गंभीर आजारावर मात करण्यासाठी “दोन थेंब” हेच सर्वात प्रभावी संरक्षण आहे. त्यामुळे कोणत्याही कारणास्तव एकही बालक या लसीकरणापासून वंचित राहू नये.
अभियानादरम्यान शासकीय रुग्णालयासह विविध पोलिओ केंद्रांवर सकाळपासूनच पालकांनी आपल्या चिमुकल्यांना घेऊन मोठ्या संख्येने हजेरी लावली. डॉक्टर, आरोग्य कर्मचारी, आशा स्वयंसेविका आणि अंगणवाडी सेविकांनी नागरिकांना पोलिओ प्रतिबंधाबाबत जनजागृती करत लसीकरण मोहिम यशस्वी करण्यासाठी विशेष प्रयत्न केले.
“प्रत्येक बालक निरोगी, प्रत्येक कुटुंब सुरक्षित आणि पोलिओमुक्त सिरोंचा हेच आपले सामूहिक ध्येय आहे,” असा निर्धार यावेळी व्यक्त करण्यात आला.
घोषवाक्य :
💧 “दोन थेंब प्रत्येक वेळी… पोलिओवर विजय दरवेळी!”
👶 “एकही बालक राहू नये वंचित, तेव्हाच घडेल पोलिओमुक्त भारत!”
About the Author
