जि.प. उच्च प्राथमिक व माध्यमिक शाळा, जीवनगट्टा (केंद्र – गेदा) येथे शाळेच्या पहिल्या दिवसाचा उत्साहात शुभारंभ; विद्यार्थ्यांचे जल्लोषात स्वागत
जीवनगट्टा | प्रतिनिधी :– गिरीश नरोटे
आज दिनांक ३०/०६/२०२६, मंगळवार रोजी जि.प. उच्च प्राथमिक व माध्यमिक शाळा, जीवनगट्टा (केंद्र – गेदा) येथे शाळेच्या नवीन शैक्षणिक वर्षाच्या पहिल्या दिवसाचे मोठ्या उत्साहात आणि आनंदी वातावरणात स्वागत करण्यात आले. नव्याने शाळेत दाखल झालेल्या तसेच उपस्थित सर्व विद्यार्थ्यांचे पुष्पगुच्छ देऊन सन्मानपूर्वक स्वागत करण्यात आले. विद्यार्थ्यांमध्ये शिक्षणाविषयी उत्साह निर्माण करण्यासाठी विविध प्रेरणादायी उपक्रमांचे आयोजन करण्यात आले.
यावेळी शाळेचे मुख्याध्यापक श्री. डी. बी. बुद्धावार सर, श्री. एस. एस. कंबगोनीवार सर, श्री. आर. सी. लेकामी सर, श्री. डी. पी. ओडरे सर, श्री. एम. एस. पुलूरवार सर आणि श्री. एस. डी. वैरागडे सर उपस्थित होते. तसेच शाळा व्यवस्थापन समितीचे अध्यक्ष श्री. रवींद्र भाऊ नरोटी यांच्यासह समितीचे सदस्य श्री. अमर गावडे, श्री. श्रीकृष्णा नैताम, सौ. सडमेक मॅडम आणि सौ. हिचामी मॅडम यांनीही कार्यक्रमाला उपस्थित राहून विद्यार्थ्यांना शिक्षणाचे महत्त्व पटवून देत त्यांचा आत्मविश्वास वाढविणारे मार्गदर्शन केले.
ही शाळा अतिमागास व दुर्गम क्षेत्रात असूनही येथील शिक्षक-शिक्षिका अत्यंत मेहनत, जिद्द आणि समर्पणाने गावातील प्रत्येक मुलापर्यंत शिक्षण पोहोचविण्याचे कार्य करीत आहेत. अनेक वेळा स्वतः गावोगावी जाऊन पालकांशी संवाद साधत मुलांना शाळेत आणण्याचा प्रयत्न केला जातो. त्यामुळे शाळेतील प्रवेशसंख्या वाढत असून विद्यार्थ्यांमध्ये शिक्षणाविषयी सकारात्मक वातावरण निर्माण झाले आहे.
विशेष म्हणजे या उपक्रमात गावकऱ्यांचाही उत्स्फूर्त सहभाग लाभला. ग्रामस्थ, पालक आणि शाळा व्यवस्थापन समिती यांच्या सहकार्यामुळे शाळेचा पहिला दिवस अविस्मरणीय ठरला. विद्यार्थ्यांच्या चेहऱ्यावरील आनंद आणि शिक्षकांचे समर्पण हे ग्रामीण भागातील शिक्षणासाठी प्रेरणादायी उदाहरण ठरत आहे.
“शिक्षण हीच खरी प्रगतीची वाट” या संदेशासह विद्यार्थ्यांच्या उज्ज्वल भविष्यासाठी सर्वांनी एकत्र येत शिक्षणाचा दीप अधिक तेजस्वी करण्याचा निर्धार यावेळी व्यक्त करण्यात आला.
About the Author
