इंदारामचा रस्ता की खड्ड्यांचे तलाव?अहेरी मुख्यालयापासून अवघ्या १५ किमी अंतरावर विकासाचा दावा उघडा; नागरिकांचा संताप
अहेरी | दि. १४ ऑगस्ट २०२६
तालुका प्रतिनिधी – गिरीष नरोटे
अहेरी तालुक्यातील मौजा इंदाराम गावाची रस्त्याची अवस्था पाहिल्यानंतर विकासाच्या दाव्यांवरच प्रश्नचिन्ह निर्माण होत आहे. अहेरी मुख्यालयापासून अवघ्या १५ किलोमीटर अंतरावर असलेल्या या गावातील रस्त्यावर मोठमोठे खड्डे पडले असून, पावसाच्या पाण्याने या खड्ड्यांना अक्षरशः तलावाचे स्वरूप आले आहे. त्यामुळे नागरिकांना जीव मुठीत घेऊन ये-जा करावी लागत आहे.
रस्त्याची ही अवस्था केवळ वाहनचालकांसाठी त्रासदायक नाही, तर आपत्कालीन परिस्थितीत रुग्ण, गरोदर माता, वृद्ध आणि विद्यार्थ्यांसाठी गंभीर अडथळा ठरत आहे. रात्रीच्या वेळी या खड्ड्यांचा अंदाज येत नसल्याने अपघाताचा धोका आणखी वाढला आहे. एखाद्या रुग्णाला तातडीने दवाखान्यात नेण्याची वेळ आली तर खराब रस्त्यामुळे उपचारासाठी पोहोचण्यास होणारा विलंब जीवघेणा ठरू शकतो.
अवघ्या १५ किमीवर अशी अवस्था, तर दुर्गम गावांचे काय?
अहेरी तालुका मुख्यालयापासून केवळ १५ किलोमीटर अंतरावर असलेल्या इंदाराम गावाच्या रस्त्याची अवस्था इतकी गंभीर असेल, तर अहेरीपासून ५० ते १०० किलोमीटर अंतरावर असलेल्या दुर्गम गावांतील रस्त्यांची परिस्थिती किती बिकट असेल, हा प्रश्न या रस्त्याच्या दृश्यातूनच स्पष्ट होतो.
एकीकडे विकासाच्या मोठमोठ्या घोषणा केल्या जातात; मात्र दुसरीकडे नागरिकांना साध्या आणि सुरक्षित रस्त्यासाठी संघर्ष करावा लागत आहे. त्यामुळे स्वातंत्र्याच्या ७९ वर्षांनंतरही ग्रामीण भागातील नागरिकांना मूलभूत सुविधांसाठी झगडावे लागत असेल, तर हा विकासाचा गंभीर प्रश्न नाही का? असा सवाल ग्रामस्थांकडून उपस्थित केला जात आहे.
स्थानिक लोकप्रतिनिधींच्या भूमिकेवरही प्रश्न
इंदाराम गावात राहणारे काँग्रेस पक्षाचे ज्येष्ठ कार्यकर्ते श्री. अजुभाऊ कंकलवार यांच्यासह ग्रामस्थांना दररोज या समस्येला सामोरे जावे लागत आहे. गावाच्या विकासासाठी प्रशासन आणि लोकप्रतिनिधींनी तातडीने लक्ष देण्याची गरज आहे.
रस्त्याच्या दुरुस्तीचे काम कागदावर न करता प्रत्यक्षात कधी होणार? नागरिकांच्या या प्रश्नाचे उत्तर संबंधित विभागाने देणे आवश्यक आहे.
ग्रामस्थांची तातडीची मागणी
इंदाराम गावातील रस्त्याची तातडीने पाहणी करून खड्डे बुजविणे, रस्त्याची मजबुतीकरणासह दुरुस्ती करणे आणि सुरक्षित वाहतुकीची व्यवस्था करणे, अशी मागणी ग्रामस्थांनी केली आहे.
स्वातंत्र्यदिनाच्या पूर्वसंध्येला इंदारामच्या रस्त्याची ही अवस्था प्रशासन आणि लोकप्रतिनिधींसाठी आत्मपरीक्षणाची वेळ आहे. ध्वजारोहणासोबतच दुर्गम गावातील नागरिकांना सुरक्षित रस्ता देण्याचा संकल्प प्रत्यक्षात उतरविणे, हीच खरी विकासाची आणि लोकसेवेची कसोटी ठरेल.
About the Author
