एटापल्ली तालुक्यातील १९७ गावांचा दुष्काळी परिस्थितीचा आढावा घ्या!
खरीप पिकांचे पंचनामे करून हेक्टरी ५० हजार रुपये नुकसानभरपाई द्या; तालुका महाग्रामसभेचे मुख्यमंत्र्यांना निवेदन
एटापल्ली | २८ ऑक्टोबर २०२६
Girish
एटापल्ली : सन २०२६ च्या खरीप हंगामात पावसातील अनियमितता, पावसाचे खंड आणि पाण्याच्या कमतरतेमुळे शेती पिकांचे नुकसान झाल्याचा मुद्दा उपस्थित करत एटापल्ली तालुका महाग्रामसभेच्या वतीने तालुक्यातील सर्व १९७ गावांमधील शेती परिस्थितीची प्रत्यक्ष पाहणी करून नुकसानग्रस्त शेतकऱ्यांना न्याय द्यावा, अशी मागणी करण्यात आली आहे. खरीप पिकांचे तातडीने पंचनामे करून प्रति हेक्टर ५० हजार रुपये नुकसानभरपाई द्यावी आणि परिस्थितीच्या निकषांनुसार एटापल्ली तालुका दुष्काळग्रस्त घोषित करण्याची कार्यवाही करावी, अशी मागणी निवेदनातून करण्यात आली आहे.
बुधवार, दिनांक २८ ऑक्टोबर २०२६ रोजी पारंपरिक तालुका महाग्रामसभा, एटापल्ली यांच्या वतीने महाराष्ट्राचे मुख्यमंत्री तथा गडचिरोलीचे पालकमंत्री आणि सहपालकमंत्री मा. ना. अॅड. आशिष जयस्वाल यांना उद्देशून हे निवेदन सादर करण्यात आले. हे निवेदन उपविभागीय अधिकारी तथा सहाय्यक जिल्हाधिकारी, उपविभागीय कार्यालय, एटापल्ली यांच्यामार्फत देण्यात आले.
तालुका महाग्रामसभेतील १९७ गावांचे ग्रामसभा प्रतिनिधी, गाव पाटील, पोलीस पाटील, भूमिया-पेरमा, ग्रामसभा अध्यक्ष, सचिव आणि शेतकऱ्यांच्या वतीने एकत्रितपणे हा प्रश्न मांडण्यात आला आहे.
शेतीच्या नुकसानीमुळे शेतकरी आर्थिक संकटात
एटापल्ली तालुक्यातील बहुतांश नागरिकांचा प्रमुख उदरनिर्वाह शेतीवर अवलंबून आहे. मात्र, यंदाच्या खरीप हंगामात पावसाचे अनियमित प्रमाण, पावसातील खंड, पाण्याची कमतरता आणि इतर नैसर्गिक कारणांमुळे पिकांच्या उत्पादनावर विपरीत परिणाम झाल्याचे निवेदनात नमूद करण्यात आले आहे. त्यामुळे शेतकऱ्यांना आर्थिक अडचणींचा सामना करावा लागत असून, त्यांच्या नुकसानीचे वस्तुनिष्ठ मूल्यांकन करणे आवश्यक असल्याचे ग्रामसभेने म्हटले आहे.
तालुक्यातील सर्व १९७ गावांतील शेती परिस्थितीचा एकत्रित आढावा घेऊन प्रत्यक्ष शेतपाहणी करावी, शासनाच्या निकषांनुसार पीक नुकसानीचे पंचनामे करावेत आणि पात्र नुकसानग्रस्त शेतकऱ्यांना तातडीने आर्थिक मदत उपलब्ध करून द्यावी, अशी मागणी करण्यात आली आहे.
महाग्रामसभेच्या प्रमुख मागण्या
१. सर्व १९७ गावांत पीक नुकसानीचे पंचनामे करा : एटापल्ली तालुका महाग्रामसभेच्या कार्यक्षेत्रातील प्रत्येक गावात खरीप पिकांची प्रत्यक्ष पाहणी करून आवश्यक पंचनामे करण्यात यावेत. नुकसानग्रस्त शेतकऱ्यांना प्रति हेक्टर ५० हजार रुपये नुकसानभरपाई देण्यात यावी.
२. दुष्काळ घोषित करण्याची कार्यवाही करा : तालुक्यातील पावसाचे प्रमाण, पीक परिस्थिती आणि शासनाने निर्धारित केलेले निकष तपासून दुष्काळसदृश परिस्थिती आढळल्यास नियमानुसार एटापल्ली तालुका दुष्काळग्रस्त घोषित करण्यासाठी तातडीने कार्यवाही करण्यात यावी.
प्रशासनाने तातडीने लक्ष देण्याची मागणी
शेतीचे नुकसान झाल्याने ग्रामीण भागातील शेतकऱ्यांसमोर आर्थिक संकट उभे राहण्याची शक्यता आहे. त्यामुळे केवळ कागदोपत्री आढावा न घेता प्रत्यक्ष शेतात जाऊन परिस्थितीची पाहणी करावी, नुकसानीचे अचूक मूल्यांकन करावे आणि शासनाच्या नियमानुसार पात्र शेतकऱ्यांना मदत मिळवून द्यावी, अशी अपेक्षा महाग्रामसभेने व्यक्त केली आहे.
आता प्रशासन या निवेदनाची कितपत गांभीर्याने दखल घेते, प्रत्यक्ष पंचनाम्यांची प्रक्रिया कधी सुरू होते आणि शेतकऱ्यांना नुकसानभरपाई मिळवून देण्यासाठी कोणती पावले उचलली जातात, याकडे एटापल्ली तालुक्यातील शेतकऱ्यांचे लक्ष लागले आहे.
शेतकऱ्यांच्या नुकसानीचे तातडीने मूल्यांकन करून त्यांना दिलासा द्यावा आणि दुष्काळाच्या प्रश्नावर शासनाने स्पष्ट भूमिका घ्यावी, हीच तालुका महाग्रामसभेची प्रमुख मागणी आहे.
About the Author
