बेसेवाडा गावाला रस्ता आणि नाला पुलाची प्रतीक्षा!
ताडगुडा पोहोच रस्त्याशी जोडण्याची CPI ची मागणी; मागण्या मान्य न झाल्यास तीव्र आंदोलनाचा इशारा
गडचिरोली | एटापल्ली
तालुका प्रतिनिधी : गिरीष डी. नरोटे
एटापल्ली : स्वातंत्र्याच्या अनेक वर्षांनंतरही एटापल्ली तालुक्यातील दुर्गम भागातील बेसेवाडा गावाला योग्य रस्त्याची सुविधा उपलब्ध नसल्याचा प्रश्न पुन्हा ऐरणीवर आला आहे. ग्रामपंचायत गट्टा अंतर्गत येणाऱ्या या आदिवासीबहुल गावाला ताडगुडा पोहोच रस्त्याशी जोडण्यासाठी माती-मुरूम रस्ता तयार करावा आणि मार्गावरील नाल्यावर कायमस्वरूपी पूल बांधावा, अशी मागणी भारतीय कम्युनिस्ट पक्षाच्या (CPI) वतीने शासन-प्रशासनाकडे करण्यात आली आहे. मागण्यांवर सकारात्मक कार्यवाही न झाल्यास गावकऱ्यांना सोबत घेऊन तीव्र आंदोलन छेडण्याचा इशाराही पक्षाने दिला आहे.
पावसाळ्यात संपर्क तुटण्याची समस्या
बेसेवाडा गाव दुर्गम व जंगल परिसरात वसलेले असून, गावाला जोडणारा मार्ग जंगल पायवाटेच्या स्वरूपात असल्याचे स्थानिक नागरिकांचे म्हणणे आहे. त्यामुळे दैनंदिन ये-जा करताना ग्रामस्थांना अडचणींचा सामना करावा लागतो. विशेषतः पावसाळ्यात मार्गावरील नाल्याला पाणी आल्यास गावाचा संपर्क बाधित होतो. याचा फटका शालेय विद्यार्थी, शेतकरी, महिला, वृद्ध नागरिक आणि रुग्णांना बसत असल्याचे सांगण्यात आले.
गावकऱ्यांनी CPI कडे मांडल्या समस्या
रस्ता आणि पुलाचा प्रश्न अनेक वर्षांपासून प्रलंबित असल्याने बेसेवाडा येथील नागरिकांनी भारतीय कम्युनिस्ट पक्षाच्या पदाधिकाऱ्यांना गावात बोलावून बैठक घेतली. या बैठकीत ग्रामस्थांनी दळणवळणाच्या समस्यांची माहिती देत रस्ता व पुलाच्या बांधकामासाठी शासन-प्रशासनाकडे पाठपुरावा करण्याची मागणी केली.
गावकऱ्यांच्या समस्या जाणून घेतल्यानंतर CPI ने हा प्रश्न प्राधान्याने उपस्थित करण्याची भूमिका घेतली. दुर्गम भागातील नागरिकांना मूलभूत सुविधांसाठी संघर्ष करावा लागणे ही चिंतेची बाब असल्याचे पक्षाच्या पदाधिकाऱ्यांनी नमूद केले.
रस्ता-पुलासाठी निधी मंजूर करण्याची मागणी
बेसेवाडा ते ताडगुडा पोहोच रस्त्यापर्यंत माती-मुरूम रस्ता तयार करणे, नाल्यावर कायमस्वरूपी पूल बांधणे, प्रत्यक्ष स्थळपाहणी व सर्वेक्षण करून अंदाजपत्रक तयार करणे आणि संबंधित शासकीय योजनांमधून निधी उपलब्ध करून काम सुरू करणे, अशा मागण्या भारतीय कम्युनिस्ट पक्षाच्या वतीने करण्यात आल्या आहेत.
“मागण्या मान्य करा, अन्यथा आंदोलन छेडू!”
भारतीय कम्युनिस्ट पक्षाचे जिल्हा सहसचिव कॉ. सचिन मोतकुरवार म्हणाले, “स्वातंत्र्याच्या इतक्या वर्षांनंतरही बेसेवाडा या आदिवासीबहुल गावाला रस्ता आणि पूल उपलब्ध नसणे ही दुर्दैवी बाब आहे. गावकऱ्यांनी CPI कडे मदत मागितल्यानंतर हा प्रश्न मार्गी लावण्यासाठी आम्ही पुढाकार घेतला आहे. शासन-प्रशासनाने रस्ता व पुलाला तातडीने मंजुरी देऊन बांधकाम सुरू करावे. अन्यथा गावकऱ्यांना सोबत घेऊन तीव्र आंदोलन छेडण्यात येईल. आदिवासी जनतेच्या हक्कांसाठी आमचा संघर्ष सुरूच राहील.”
प्रशासनाच्या भूमिकेकडे लक्ष
या बैठकीला CPI चे जिल्हा सहसचिव कॉ. सचिन मोतकुरवार, जिल्हा सदस्य कॉ. सुरज जककुलवार आणि बेसेवाडा गावातील नागरिक उपस्थित होते.
बेसेवाडा गावाला मुख्य रस्त्याशी जोडण्यासाठी रस्ता व पुलाचे बांधकाम तातडीने मंजूर करून आवश्यक निधी उपलब्ध करावा, अशी मागणी पक्षाने केली आहे. या मागणीवर संबंधित प्रशासनाकडून कोणती कार्यवाही केली जाते, याकडे आता ग्रामस्थांचे लक्ष लागले आहे.
— त्रिवेणी न्यूज एक्स्प्रेस
About the Author
