कोईदूळच्या जि.प. शाळेत शिक्षकांच्या कथित गैरहजेरीचा मुद्दा ऐरणीवर
शिक्षक नियमित गैरहजर असल्याचा गावकऱ्यांचा आरोप; विद्यार्थ्यांच्या शिक्षणाचे काय? प्रशासनाच्या भूमिकेकडे लक्ष
एटापल्ली, प्रतिनिधी : गडचिरोली जिल्ह्यातील एटापल्ली तालुक्यातील मौजा कोईदूळ येथील जिल्हा परिषद उच्च प्राथमिक शाळेतील शिक्षकांच्या कथित गैरहजेरीचा मुद्दा सध्या चर्चेत आला आहे. शिक्षक श्री. वाळके सर हे नियमितपणे शाळेत उपस्थित राहत नसल्याचा आरोप गावकऱ्यांनी केला असून, कधी शाळेत आले तरी उशिरा येतात आणि लवकर निघून जातात, अशी तक्रार ग्रामस्थांकडून करण्यात येत आहे.
कोईदूळ येथील शाळेत इयत्ता पहिली ते चौथीपर्यंतचे विद्यार्थी शिक्षण घेत आहेत. अशा परिस्थितीत शिक्षकांची नियमित उपस्थिती अत्यंत महत्त्वाची असताना कथित गैरहजेरीमुळे विद्यार्थ्यांच्या शिक्षणावर परिणाम होण्याची भीती गावकऱ्यांनी व्यक्त केली आहे.
गावकऱ्यांच्या म्हणण्यानुसार, संबंधित शिक्षक चामोर्शी येथे वास्तव्यास असून, कोईदूळ शाळेपासून त्यांचे अंतर सुमारे ६५ ते ७० किलोमीटर असल्याचे सांगितले जाते. त्यामुळे एवढ्या लांबून दररोज नियमितपणे शाळेत येणे-जाणे शक्य आहे का आणि त्याचा विद्यार्थ्यांच्या अध्यापनावर परिणाम होतो का, असा प्रश्न ग्रामस्थ उपस्थित करीत आहेत.
“शिक्षक गावात राहून विद्यार्थ्यांना शिकवावेत”
गावातच वास्तव्यास राहून विद्यार्थ्यांना नियमित शिक्षण द्यावे, अशी मागणी गावकऱ्यांकडून करण्यात येत आहे. दुर्गम आदिवासी भागातील विद्यार्थ्यांना दर्जेदार आणि नियमित शिक्षण मिळणे हा त्यांचा मूलभूत हक्क असून, शिक्षकांच्या उपस्थितीबाबत प्रशासनाने स्पष्ट भूमिका घ्यावी, अशी अपेक्षा ग्रामस्थ व्यक्त करीत आहेत.
दुर्गम भागातील शिक्षण व्यवस्थेवर प्रश्नचिन्ह
कोईदूळसारख्या दुर्गम भागात शिक्षणाची परिस्थिती सुधारण्यासाठी शासनाकडून विविध योजना राबविल्या जात असल्या, तरी प्रत्यक्ष गावपातळीवर शिक्षकांची नियमित उपस्थिती आणि विद्यार्थ्यांचे शिक्षण याबाबत प्रश्न निर्माण होत असतील तर त्याची गांभीर्याने दखल घेण्याची गरज आहे.
गावकऱ्यांचा आणखी एक गंभीर मुद्दा म्हणजे परिसरातील मूलभूत सुविधांचा अभाव. काही काळापूर्वी नाल्यावर पूल नसल्यामुळे एका गर्भवती महिलेला नदी-नाला पार करण्यासाठी काठावरून नेण्याची वेळ आल्याचा दावा ग्रामस्थांनी केला आहे. दुर्गम भागातील अशा परिस्थितीत शिक्षणासोबतच रस्ते, पूल, आरोग्य आणि इतर मूलभूत सुविधांकडेही प्रशासनाने लक्ष देण्याची मागणी होत आहे.
प्रशासनाने चौकशी करून वस्तुस्थिती स्पष्ट करावी
शिक्षकांच्या उपस्थितीची अधिकृत नोंद, शाळेतील उपस्थिती रजिस्टर, विद्यार्थ्यांचे अध्यापन आणि शाळेतील प्रत्यक्ष शैक्षणिक कामकाज याची संबंधित शिक्षण विभागाने तपासणी करावी, अशी मागणी ग्रामस्थांकडून होत आहे.
शिक्षक श्री. वाळके यांची प्रत्यक्ष भूमिका तसेच शिक्षण विभागाचे अधिकृत स्पष्टीकरण अद्याप समोर आलेले नाही. त्यामुळे प्रशासनाने या प्रकरणाची निष्पक्ष चौकशी करून वस्तुस्थिती गावकऱ्यांसमोर स्पष्ट करावी, अशी अपेक्षा व्यक्त होत आहे.
“शिक्षक नियमित शाळेत उपस्थित नसतील तर दुर्गम भागातील विद्यार्थ्यांचे भविष्य कोण घडवणार?” हा सवाल सध्या कोईदूळच्या ग्रामस्थांकडून उपस्थित केला जात आहे.
About the Author
