कोंदावाही येथे काटी-वेल्ली देवस्थानाची वार्षिक पेन पुंगाई पूजा उत्साहात संपन्न!
माजी पंचायत समिती सदस्य हर्षवर्धन बाबा आत्राम यांच्यासह डॉ. मिताली अक्का आत्राम यांनी घेतले देवीचे दर्शन; शेकडो भाविकांची उपस्थिती
तालुका प्रतिनिधी अहेरी : तिरुपती मडावी
एटापल्ली : एटापल्ली तालुक्यातील मौजा कोंदावाही येथील काटी-वेल्ली सार्वजनिक देवस्थानाची सन २०२६ मधील वार्षिक पेन पुंगाई पूजा धार्मिक वातावरणात आणि उत्साहात संपन्न झाली. या पूजेनिमित्त परिसरातील आदिवासी बांधवांसह एटापल्ली व अहेरी तालुक्यातील शेकडो भाविकांनी उपस्थित राहून श्रद्धापूर्वक देवीचे दर्शन घेतले.
या धार्मिक सोहळ्यात माजी पंचायत समिती सदस्य हर्षवर्धन बाबा आत्राम यांनी काटी-वेल्ली देवस्थानात विधिवत पूजा-अर्चा करून देवीचे आशीर्वाद घेतले. यावेळी डॉ. मिताली अक्का आत्राम यांनीही उपस्थित राहून देवीचे दर्शन घेतले.
आदिवासी परंपरा आणि संस्कृतीचे दर्शन
पेन पुंगाई पूजा ही आदिवासी समाजाच्या पारंपरिक श्रद्धा, संस्कृती आणि धार्मिक परंपरेचा महत्त्वपूर्ण भाग आहे. या पूजेद्वारे देवतांप्रती कृतज्ञता व्यक्त करून समाजाच्या सुख-समृद्धी, कल्याण आणि भरभराटीसाठी प्रार्थना केली जाते. कोंदावाही येथे पार पडलेल्या या वार्षिक पूजेमुळे आदिवासी समाजाच्या समृद्ध सांस्कृतिक वारशाचे दर्शन घडले. या सोहळ्यात शेकडो भाविकांनी सहभागी होत आपली श्रद्धा व्यक्त केली.
मान्यवरांसह कार्यकर्त्यांची उपस्थिती
या प्रसंगी राष्ट्रवादी युवक काँग्रेसचे जिल्हा सचिव तथा येरमानारचे माजी सरपंच बालाजी गावडे, माजी जिल्हा परिषद सदस्य रामजी कत्तीवार, माजी सभापती मडावी मॅडम, येमलीच्या माजी सरपंच ललिता मडावी तसेच देवस्थानाचे मुखिया, भूमिया, वड्डे आणि पुजारी उपस्थित होते.
तसेच राष्ट्रवादी काँग्रेस पक्षाचे कार्यकर्ते बाबुराव तलांडी, लालू तलांडी, तिरुपती मडावी, सुनील नैताम, योगेश तलांडी आणि आकाश राऊत यांच्यासह एटापल्ली व अहेरी तालुक्यातील नागरिक आणि शेकडो भाविकांनी या धार्मिक सोहळ्यात सहभाग नोंदविला.
श्रद्धा, परंपरा आणि सामाजिक एकतेचा संगम
काटी-वेल्ली देवस्थानाच्या वार्षिक पेन पुंगाई पूजेच्या निमित्ताने परिसरातील नागरिक एकत्र आले. धार्मिक श्रद्धेसोबतच आदिवासी समाजाच्या पारंपरिक चालीरीती आणि सांस्कृतिक वारसा जतन करण्याचे महत्त्व या सोहळ्यातून अधोरेखित झाले.
About the Author
