जागतिक पांढरी काठी दिनानिमित्त दृष्टिहीन बांधवांना धान्य किट व पांढऱ्या काठीचे वितरण!
मैत्री परिवार, युवागर्जना फाऊंडेशन आणि राष्ट्रीय दृष्टिहीन महासंघाचा संयुक्त उपक्रम; सामाजिक बांधिलकीचा दिला संदेश
तालुका प्रतिनिधी, अहेरी : तिरुपती मडावी
गडचिरोली : जागतिक पांढरी काठी दिनाचे औचित्य साधून गडचिरोली येथे दृष्टिहीन बांधवांना धान्य किट आणि पांढऱ्या काठीचे वितरण करून सामाजिक बांधिलकी जपणारा उपक्रम राबविण्यात आला. मैत्री परिवार संस्था, युवागर्जना फाऊंडेशन, गडचिरोली आणि राष्ट्रीय दृष्टिहीन महासंघ, महाराष्ट्र यांच्या संयुक्त विद्यमाने हा कार्यक्रम आयोजित करण्यात आला.
शनिवार, दिनांक १७ ऑक्टोबर २०२६ रोजी सकाळी ११ वाजता अभिनव लॉन, गडचिरोली येथे आयोजित या कार्यक्रमाला डॉ. मिताली अक्का हर्षवर्धन आत्राम यांची प्रमुख उपस्थिती होती. गडचिरोली नगरपरिषदेच्या नगराध्यक्षा सौ. प्रनोती निंबोरकर यांच्या हस्ते कार्यक्रमाचे उद्घाटन करण्यात आले, तर राष्ट्रीय दृष्टिहीन महासंघ, महाराष्ट्राचे अध्यक्ष भोजराज पाटील यांनी कार्यक्रमाचे अध्यक्षस्थान भूषविले.
यावेळी पोलीस निरीक्षक चव्हाण साहेब, जिल्हा आरोग्य अधिकारी प्रताप शिंदे, सेवानिवृत्त कार्यकारी अभियंता पांडुरंग वाकडे पाटील, राष्ट्रीय दृष्टिहीन महासंघाचे सचिव पी. डी. जाधव, मैत्री परिवार संस्थेचे अध्यक्ष निरंजन वासेकर तसेच युवागर्जना फाऊंडेशनचे अध्यक्ष व नगरपरिषदेचे उपाध्यक्ष नितीन चरडे यांच्यासह विविध क्षेत्रांतील मान्यवर उपस्थित होते.
स्वावलंबनाला बळ, सुरक्षिततेला आधार
दृष्टिहीन बांधवांना दैनंदिन जीवनात अधिक स्वावलंबीपणे वावरता यावे, सुरक्षितपणे मार्गक्रमण करण्यासाठी आवश्यक साधने उपलब्ध व्हावीत आणि त्यांच्या जीवनात सामाजिक आधार निर्माण व्हावा, या उद्देशाने धान्य किट व पांढऱ्या काठीचे वितरण करण्यात आले. पांढरी काठी हे दृष्टिहीन व्यक्तींसाठी सुरक्षित हालचालीचे महत्त्वाचे साधन असून, त्यांच्या स्वावलंबनाच्या प्रवासात तिची महत्त्वपूर्ण भूमिका असते.
या उपक्रमातून दिव्यांग व्यक्तींप्रती संवेदनशीलता, समानतेची भावना आणि मानवतेचा संदेश देण्यात आला. समाजातील प्रत्येक व्यक्तीला सन्मानाने जगण्याची संधी मिळावी, तसेच दृष्टिहीन बांधवांना आवश्यक सहकार्य आणि प्रोत्साहन मिळावे, हा या उपक्रमामागील प्रमुख हेतू होता.
मानवतेचा भावस्पर्शी संदेश
“अनंताच्या पलीकडे जाऊनही अस्तित्व उरावे, तुमच्या डोळ्यांतून कुणीतरी जग बघावे,” या भावस्पर्शी संदेशातून दृष्टिहीन बांधवांच्या जीवनात आधार, आत्मविश्वास आणि आशेचा प्रकाश निर्माण करण्याचा प्रयत्न करण्यात आला.
समाजातील गरजू आणि दिव्यांग बांधवांच्या मदतीसाठी अशा उपक्रमांची आवश्यकता अधोरेखित झाली. मैत्री परिवार संस्था, युवागर्जना फाऊंडेशन आणि राष्ट्रीय दृष्टिहीन महासंघ, महाराष्ट्र यांच्या संयुक्त पुढाकारातून आयोजित हा कार्यक्रम सामाजिक एकोपा आणि मानवतेचे महत्त्व अधोरेखित करणारा ठरला.
About the Author
